Maamulka gobolka Banaadir iyo Shacabka oo is kaashanaya ayaa ku guuleystay inay demiyaan dab xooggan oo fiidkii hore ee Caawa ka kacay Suuqa degmada Xamarweyne ee magaalada Muqdisho.
Dabka ayaa markii hore ka kacay suuqa qeybta Masjidka Marwaaz, waxaa uuna ku fiday qeybaha Suuqa Dahablaha, kawaanka Hilibka iyo meelo kale, waxaana dabka uu socday laba saac oo xiriir ah.
Khasaaro hantiyadeed oo farabadan ayaa ka dhashay dabka ka kacay Suuqa Xamar-weyne, isla markaana waxa uu baabi’iyay goobo Ganacsi oo Suuqa ku yaalay, sida ay sheegeen qaar kamid ah Ganacsatada.
Maamulka Gobolka Banaadir ayaan weli wax faah faahin ah ka bixin khasaaraha baaxada leh ee uu geystay dabka, oo la tilmaamay inuu markii hore uu ka dhashay koronto ku jirtay goob Ganacsi.
Magaalada Muqdisho ayaa waxaa muddooyinkii dambe ku soo badanayay dhacdooyinka la xiriira gubashada oo horay uga dhacday Bakaaraha iyo xaafado kale oo ku yaal caasimada.