Muwaadiniin Soomaali ah oo kamid ahaa Ganacsatada Soomaaliyeed ee dalka Koonfur Afrika ayaa xalay lagu dilay dukaan ay ka wada shaqeynayeen oo ku yaala xaafad hoostagta Phillipi ee magaalada Cape Town ee dalkaasi.
Burcad hubeysan oo Koonfur Afrikaan ah ayaa weerar ku qaaday dukaanka ay joogeen laba Muwaadiniin Soomaali ah, kuwaasi oo lagu dilay toogasho ka dhex dhacday gudaha dukaan ah ay ka shaqeyn jireen labadaasi ruux ee Soomaalida ahaa.
Allaha u naxariistee Muwaadiniinta ayaa waxaa lagu kala magacaabi jiray Yuusuf Maxamed Taakow iyo Maxamed Deeq Muxudiin Dhaakul, waxayna kamid ahaayeen Dhallinyarada fir fircoon ee kunool magaalada Cape Town.
Dilkan ayaa imaanaya xilli maalmo kahor sidaan oo kale dhallinyaro Soomaaliyeed lagu dilay qeybo kamid ah dalka Koonfur Afrika, dilalka Soomaalida loo gesanayo ayaana noqday kuwa joogta ah oo aysan jirin cid wax ka qabaneysa.
