Roobab mahiigaan ah ayaa saacado badan ka da’ayay magaalada Gaalkacyo ee Xarunta Gobolka Mudug. Roobabka ayaa waxaa ka dhashay khasaaro nafeed iyo mid hantiyadeed, kadib markii biyaha roobka ay keeneen daadad waaweyn.
Xaafadaha kala duwan ee Gaalkacyo ayaa lasoo wariyay inay dhex ceegaan biyaha roobabka, waxaana soo dumay guryo ku yaalla halkaasi oo ay deganaayeen dad shacab ah, kuwaasi oo uu saameeyeen roobabkii xoogganaa ee Gaalkacyo ka da’ayay.
Wararka ayaa intaas kusii daraya in daadadkii ka dhashay roobabka ay qaadeen dad, isla markaana waxaa dadkaasi qaarkood loo sameeyay gurmad lagu soo badbaadiyay, sida ay kusoo warrameen qaar kamid ah dadka deegaanka Gaalkacyo.
Gobolada dalka ayaa waxaa ka curtay roobka Deyrta ah, waxaana muddooyinkii dambe ay dowladda Federaalka Soomaaliya ay Digniin kasoo saareysay roobab wata daadad, dowladda ayaana dadka uga digay inay ka fogaadan goobaha ay khatarta uga imaan karto.