Maxkamadda darajada koowaad ee ciidamada qalabka sida ayaa Maanta oo Axad ah waxa ay bilowday dhageysiga kiiska 11 mas’uul oo ka tirsanaa Maamulka degmada Hodan ee magaalada Muqdisho, kuwaasi oo la horgeeyay Maxkamadda ciidamada.
Mas’uuliyiintan oo ahaa Guddoomiye waaxeedyo ka tirsanaa Maamulka Hodan ayaa waxaa loo heystaa inay wadashaqeyn la’lahaayeen dagaalamayaasha Al-Shabaab, isla markaana ay ahaayeen shabakad isku xiran oo ka kooban 11 xubnood.
Shabakadan oo gaareysa 11 ruux oo 8 kamid ah ay yihiin rag, halka saddex kalena ay dumar yihiin ayaa waxaa hoggaamiye u ahaa nin lagu magacaabo Cabdiraxiin Maxamed Cismaan Jimcaale (Macruuf), sida ay sheegtay xeer ilaalinta Maxkamadda ciidamada.
Sidoo kale mas’uuliyiintan loo heysto ay la shaqeynayeen Shabaab ayaa la tilmaamay inay ka howlgeli jireen degmooyinka kala ah Hodan, Howlwadaag, Heliwaa, Dayniile, Yaaqshiid iyo deegaanka Daarusalaam ee duleedka magaalada Muqdisho.
Sidoo kale waxaa kooxdan kamid ah sarkaal ka tirsan Booliska oo u goostay Al-Shabaab, kaas oo magaciisa lagu sheegay Ayaanle Maxamed Cali, kana howlgalayay saldhigga degmada Hodan, xubnaha kale ee Maxkamadda la horgeeyay ayaa waxaa ku jiray
Shariif Nuur Cali Awliyo oo ahaa guddoomiye waaxeed ayaa loo heystaa inuu ahaa wakiilka shabakadda ee degmada Hodan, waxaana uu wajahayaa xog ka gudbinta qaraxii Soobe 2, abaabulka qarax miino oo loo dhigay taliyaha saldhigga Hodan iyo wax ka qorsheynta dil loo gaystay muwaadin Soomaaliyeed oo lagu magacaabi jiray Mahad Maxamed Cali.