Faah faahino dheeraad ah ayaa kasoo baxaya Israsaaseyn saaka ka dhacday magaalada Jowhar ee Xarunta Gobolka Shabeellaha Dhexe, taasi oo dhexmartay ciidamo ka wada tirsan kuwa dowladda Federaalka Soomaaliya ee jooga magaaladaasi.
Dad ku sugan Jowhar oo la hadlay Radio Dalsan ayaa u sheegay in israsaaseynta ay si gaar ah u dhexmartay ciidamo Milateri ah iyo kuwa DANAB, waxaana ka dhashay khasaaro isugu jira dhimasho iyo dhaawac oo gaaray Askar iyo dad shacab ah.
Ugu yaraan labo ruux ayaa ku geeriyootay oo mid ka mid ahaa qof rayid ah, halka qof kalena uu ku dhaawacmay, waxaana qofka dhintay uu ahaa ganacsade oo goobtiisa ganacsi ugu tagtay xabad wiifto ah.
Ciidamo ka tirsan kuwa ammaanka Maamulka Hirshabeelle ayaa gaaray aaga uu falka ka dhacay, xaaladda ayaana ah mid dagan haatan, iyadoona bilowdeen isu socodkii iyo ganacsigii oo muddo kooban hakad ku yimid.
Illaa iyo hada ma jiro wax war ah oo kasoo baxay saraakiisha ammaanka Maamulka Hirshabeelle oo ay uga hadlayaan israsaaseyntii saaka ka dhacday magaalada Jowhar ee Xarunta Gobolka Shabeellaha Dhexe ahna caasimadda Maamulkaasi.