Warar dheeraad ah ayaa kasoo baxaya qarax is-miidaamin ah oo loo adeegsaday gaari laga soo buuxiyay waxyaabaha qarax oo Aroornimadii hore ee saaka oo sabti ah lagu weeraray Saldhig ciidanka Boolis Milataaro ay ku leeyihiin deegaanka Ceelasha Biyaha ee duleedka magaalada Muqdisho.
Qaraxa oo ahaa mid xooggan ayaa dhaliyay khasaaro isugu jira dhimasho iyo dhaawac, sida ay kusoo warrameen qaar kamid ah dadka deegaanka oo la hadlay Dalsan oo sheegay in saaka ay kusoo tooseen jugTa qarax aad u weyn oo deegaanka ka dhacay.
Ciidanka ku sugnaa saldhiga la weeraray ayaa laga soo xigtay in gaariga inta uusan qarxin ay rasaas farabadan ku fureen, balse markii dambe uu ku qarxay afaafka hore ee saldhiga Ciidanka Boolis Milataaro ay ku leeyihiin Ceelasha Biyaha.
Dad isugu jira Askar iyo shacab ayaa ku dhintay qaraxa, dhowr qof kalena way ku dhaawacmeen, kuwaasi oo durbadii gaadiidka gurmadka deg dega ah ay ula carareen isbitaalada ku yaalla Muqdisho, sidoo kalena qaraxa ayaa geystay burbur baaxad leh, sida ay muujinayaan sawiro goobta laga soo qaaday.
Ma jiro wax hadal ah oo kasoo baxay saraakiisha laamaha ammaanka Soomaaliya oo ku aadan qaraxa ka dhacay deegaanka Ceelasha Biyaha oo ku yaalla waddada dheer ee xiriirisa magaalooyinka magaalada Muqdisho iyo Afgooye ee Gobolka Shabeellaha Hoose.