Madaxweynaha dowladda Federaalka Soomaaliya Xasan Sheekh Maxamuud iyo wafdi ballaaran oo uu hoggaaminayo ayaa Maanta oo Axad ah waxa ay ku wajahan yihiin degmada Maxaas ee Gobolka Hiiraan ee dowlad Goboleedka Hirshabeelle.
Ujeedka safarka Madaxweynaha ee Maxaas ayaa waxa uu yahay dardar-gelinta howlgalka lagula dagaalamyo Al-Shabaab ee ka socda qeybo kamid ah Gobolada Hiiraan, Shabeellaha Dhexe, Galgaduud iyo Mudug ee maamulada Hirshabeelle iyo Galmudug.
Shalay ayaa waxa tagay Maxaas xubno ay kamid ahaayeen Wasiirka Batrooka ee Dawladda Federaalka Cabdirisaaq Cumar Maxamed, Xildhibaanno ka tirsan Baarlamaanka Federaalka iyo Gudoomiyihii hore ee Gobolka Hiiraan Cali Jeyte Cismaan.
Qaban-qaabada lagu soo dhaweynayo Madaxweyne Xasan Sheekh ayaa haatan ka socota degmada Maxaas ee Gobolka Hiiraan, waxaana aad loo adkeeyay amniga degmadaas, sidoo kalena la xiray inta badan waddooyinka.
Madaxweyne Xasan Sheekh ayaa dhawrkii todobaad ee ugu dambeeyay ku sugnaa degmada Dhuusamareeb ee xarunta maamulka Galmudug, halkaas oo uu kala socday hawgalka ciidanka ee la doonayo in Al-Shabaab looga saaro deegaannada ay maamulaan ee Galmudug.
Lama oga inta uu Madaxweynuhu sii joogi doono Maxaaas, waxana la filayaa in uu waxgaradka deegaanka kala hadlo sidii loo xoojin lahaa duulaanka ka dhanka ah kooxda Al-Shabbaab.