Warrar dheeraada ayaa ka soo baxaya qarax barqadii Maanta ka dhacay gudaha xero ku taalla kuliyadda Jaale Siyaad ee magaalada Muqdisho, jugta qaraxaasi ayaa waxaa laga malqay inta badan degmooyinka Gobolkaan Banaadir.
Illo wareedyo ka tirsan Milatariga Soomaaliya ayaa BBC-da u sheegay in 25 askari ay dhinteen, kaddib markii nin isku soo xiray walxaha qarxa uu isku qarxiyay ciidanka oo saf ku jira, isla markaana xilligaas sameeynayay gaardis.
Dhawr iyo afartan kale ayaa la sheegay inay dhaawacmeen kuwaas oo loo kala qaaday isbitaalo ku yaala Muqdisho, sida xaaladdooda caafimaad loogu dabiibo.
Ninka is qarxiyay ayaa xirnaa dareeska ciidanka, isagoo gudaha xerada ku galay aqoonsi, sida il wareed ka tirsan Miltariga oo aan doonayn in magaciisa la sheego uu Idaacadda BBC-da u sheegay.
Qoraal ay Al-Shabaab ku faafiyeen barahooda Interner-ka ayaa lagu sheegay in ninka is qarxiyay uu dilay 73 askari oo ka tirsan ciidanka dowladda Federaalka , isla markaana uu dhaawacay 124 kale, in kastoo cid madaxbannaan oo xaqiijisay sheegashadaasi aanay jirin.
Illaa hadda ma jiro war rasmi ah oo ka soo baxay miltariga Soomaaliya oo ka hadlaya sida xerada kuliyadda Jaale Siyaad ay wax uga dhaceen iyo tirada khasaaraha ciidanka ka soo gaaray qaraxa lala beegsaday.
