Dagaal u dhexeeyay ciidanka xoogga dalka, kuwa deegaanka ee macwiisleyda oo isku dhinac ah iyo Al-Shabaab ayaa waxa uu saaka ka dhacay deegaannada Beeroyabaal iyo Baardheere oo Gobalka Hiiraan ee dowlad Goboleedka Hirshabeelle.
Dagaalka oo mid xooggan ayaa waxa uu bilowday ka gadaal markii ciidanka xoogga iyo kuwa deegaanka ay weerar ku qaadeen goob ay ku sugnaayeen dagaalamayaasha Al-Shabaab, sida ay ku warrantay Warbaahinta ku hadasha afka dowladda Federaalka.
Wararka la helayo ayaa sheegaya in dagaalka oo la isku adeegsanayo hubka culus uu weli ka socdo deegaano ka tirsan Gobolka Hiiraan, isla markaana uu ka dhashay khasaaro dhimasho iyo dhaawac leh, inkastoo aan weli la xaqiijin inta uu la egyahay.
Wararka ayaa intaas kusii daraya in duqeymo xooggan oo dhanka cirka ah ay barbar socdaan dagaalka, waxaana diyaarado dagaal duqeymo la beegsadeen goobihii ay ku sunaayeen Shabaabka.
Dowladda Federaalka Soomaaliya ayaa sheegtay in faah faahin dheerada ah ka bixin doonto howlgalkan isugu jiray dagaalka iyo duqeymaha ka dhacay Gobolka Hiiraan.
