Maxkamadda Ciidamada ee Soomaaliya ayaa xukun dil ah ku riday, sarkaal horey uga tirsanaa milatariga oo lagu helay dambi ah, inuu maleegay weerar horraantii sanadkan lagu qaaday garoonka diyaaradaha Aden Cabdulle ee magaalada Muqdisho.
Sarkaalkan oo la yiraahdo Maxamed Cabdulle Nuur Abkoow ayaa ciidanka Soomaaliya ku biiray xiligii dawladdii Cabdillahi Yuusuf, inkastoo markii dambe laga saaray 2018 kii.
Maxkamadda ayaa sheegtay in uu sarkaalkan gaarigiisa ku geeyay gudaha garoonka Aden Cabdulle labadii nin ee ka tirsanaa Al-Shabaab ee weerartay garoonka diyaaradaha 23 kii bishii Maarso ee sanadkan 2022, waxana weerarkaas ku dhintay askari ka tirsanaa ciidanka gaarka ah ee booliska Soomaaliya ee loo yaqaano Haramcad.
Maxkamaddu waxay kaloo sheegtay in Maxamed uu ka dambeeyay qarax la geeyay xarunta ciidamada ee Villa Baydhabo ee magaalada Muqdisho.
Maxkamadda ayaa ugu dambayn Maanta Go’aan ka soo saartay Maxamed Cabdulle Nuur Abkow (Biyamaalow) waxa ayna ku xukuntay Dil toogasha ah oo ah Qosaasta Marxuun Cabdirisaaq Aabi Cali, sida uu Warbaahinta u sheegay Gaashaanle Sare Xasan Cali Nuur Shuute Guddoomiyaha Maxkamadda Darajada Koowaad Ee Ciidamada Qalabka Sida.