Madaxweynaha Jahmuuriyadda Federaalka Soomaaliya Xasan Sheekh Maxamuud iyo wafdi uu hoggaaminayo ayaa goor dhow ka dhoofay Garoonka diyaaradaha Aadan Cadde ee magaalada Muqdisho, iyaga oo kusii jeeday dalka Ereteriya.
Madaxweyne Xasan Sheekh ayaa mudnaanta siinaya Ciidamada Soomaaliyeed ee ku sugan dalkaas iyo kor u qaadidda doorka dalalka Gobolku ay ku leeyihiin dagaalka ka dhanka ah Alshabaab, waa sida lagu sheegay War kasoo baxay Madaxtooyada.
Madaxweynaha ayaa dhigiisa dalka Ereteriya Asias Afwerki la yeelan doona wada-xaajoodyo ku saabsan kor u qaadidda xiriirka labada dal iyo iskaashiga labada shacab ee walaalaha ah.
Dalka Ereteriya ayaa waxaa ku sugan kumanaan Askari oo kamid ah Ciidanka dowladda Federaalka, kuwaasi oo lagu tababaray dalka Ereteriya , waana safarkii labaad uu Madaxweynaha ku aadayo dalkaas oo markii la doortay uu booqasho ku tagay.