Maamulka Somaliland ayaa Maanta ka jawaabay hadal kasoo yeeray Taliyaha Ciidanka Daraawiishta dowlad Goboleedka Puntland Abshir Cabdi Jaamac oo ku aadanaa in Somaliland ay magan-geliso kooxaha waxa loogu yeero Argagixisada.
Taliyaha guud ee Ciidamada Somaliland Jeneraal Nuux Ismaaciil Taani oo Maanta warbaahinta kula hadlay magaalada Hargeysa ayaa waxba kama jiraan ku tilmaamay in Somaliland magan-geliso kooxaha waxa loogu yeero Argagixisada.
Sidoo kale Taliyaha Ciidamada Somaliland ayaa waxaa uu hadalkiisa intaas kusii daray in liiskii u danbeeyay ee shakhsiyaadkii dowladda Maraykanku ku tilmaamay Argagixisada ay dhammaantood ka soo jeedaan deegaannada Puntland.
Jeneraal Nuux Ismaaciil Taani ayaa Puntland ku eedeeyay inay hurineyso dagaal dhexmara labada dhinac, balse wuxuu xusay inay yaqaanaan waxa uu dagaal yahay, isla markaana haddii tallaabo qaadaan Maamulkaas ay jawaab ka bixin doonaan.
Isaga oo sii hadlaayay Taliyaha guud ee Ciidamada Somaliland ayaa waxaa uu tilmaamay in Maamulka Puntland ay ku ixtiraamayaan derisnimo, hayeeshee waxaa uu sheegay in maalmahaan ay Colaad hurinayaan oo hanjabaado wadaan, taasina aysan aheyd wax la aqbali karo.
Si kastaba, Maamulka Puntland ayaa marar kala duwan Somaliland ku eedaysay in ay xiriir iyo wada-shaqayn la leeyihiin kooxaha Argagixisada, balse Somaliland mar kasta waa beenisaa arrintaas.
