Dibadbaxyo looga soo horjeedo dilka xildhibaan Juweeriya Subcis ayaa ka dhacay Magaalada Jigjiga kadib markii shaley askari ka tirsan booliska federaalka Itoobiya uu garoonka diyaaradaha ee magaalada Jigjiga ku dilay xilli uu rasaas ku furay halkaas.
Dadweyne careysan ayaa isugu soo baxay guriga xildhibaan Juweeriya, waxay dalbanayaan caddaalad.
Taliyaha booliska Dowlad Deegaanka Soomaalida Itoobiya ayaa sheegay in aanan weli la ogeyn sababta uu askarigaas xabadda ugu furay dadkii safrayay, balse uu socdo baaritaan.
Wuxuu intaa ku daray in gacanta lagu soo dhigay Askariga ka tirsan ciidamada Federaalka Itoobiya ee ilaaliya garoonka diyaaradaha ee magaalada Jigjiga, kaas oo rasaas uu furay ay ku dhimatay gabar ka tirsaneyd xildhibaannada deegaanka Soomaalida ee dalkaas.