Kooxo ku hubeysnaa Bastoolado ayaa habeenkii xalay aheyd waxaa ay xaafad ka tirsan gudaha degmada Kaxda ee Gobolkaan Banaadir ku dileen Askari ka tirsanaa Ciidanka dowladda Federaalka Soomaaliya gaar ahaan kuwa Booliska dowladda.
Goobjoogayaal ayaa waxaa ay ku warrameen in Askariga Booliska ahaa la toogtay, xilli uu kusoo baxay masaajid uu kusoo tukaday salaadii cishaha ee xalay, wuxuuna si gaar ah dalkiisa uga dhacay waaxda koowaad ee Jeneraal Liiq-liiqato ee degmada Kaxda.
Askariga la dilay ayaa waxaa lagu magacaabi jiray Maxamed Yaasiin Jalaf, isla markaana waxaa goobta ka baxsaday kooxihii ka dambeeyay dilka khaarijinta ahaa oo tiradooda lagu sheegay inay ahaayeen saddex ruux oo dhallinyaro oo watay Bastoolado.
Ciidamo ka tirsan kuwa ammaanka degmada Kaxda ee Gobolka Banaadir ayaa durbadii sida caadada aheyd gaaray goobta uu falka ka dhacay, kana qaaday Meydka Askariga la dilay, mana jirto cid illaa iyo had loo qabtay falkaas ka dhacay magaalada Muqdisho.
Falal amni darro sida dalal qorsheysan iyo weeraro ayaa mararka qaarkood ka dhaca gudaha agaalada caasimadda ah ee Muqdisho, waxaana inta badan falalkaas mas’uuliyadooda sheegta oo dusha u rita dagaalamayaasha Al-shabaab.