Madaxweynaha Dowladda Hirshabeelle Mudane Cali Guudlaawe Xuseen ayaa tacsi tiiraanyo leh u diray qoysaska, qaraabada iyo guud ahaan shacabka Soomaaliyeed ee ay ka geeriyoodeen Allaha u naxariistee Wasiirkii Wasaaradda Caafimaadka iyo Daryeelka Bulshada Marxuum Dr Sakariye Maxamed Axmed, Xildhibaan Geelle Isaaq Warsame, Gudoomiye Ku Xigeenkii Maaliyadda iyo Siyaasada Gobolka Hiiraan Marxuum Abuukar Maadey iyo dhamaan muwaadiniintii ku shahiiday qaraxyadii maanta ka dhacay Magaalada Beledweyne.
Madaxweynaha ayaa tilmaamay in Alshabaab ay caadeysteen daadinta dhiigga shacabka Soomaaliyeed, waa sida uu hadalka u dhigaye, waxaana intaasi uu ku daray in Alshabaab ay dagaaladii u dambeeyay ee lagula galay deegaanada Gobolka Hiiraan ay ku jabeen.
Madaxweynaha ayaa shacabka Soomaaliyeed ugu baaqay in si wadajir ah ay uga qeybgalaan howlgallada iyo dagaalada ka dhanka ah Al-Shabaab.
Madaxweyne Cali Guudlaawe ayaa Alle uga baryay dhamaan dadkii ku shahiiday qaraxyadii argagixiso in uu hoygooda ka yeelo Jannatul Firdowsa, Inta dhaawacyadu ka soo gaareenna uu Eebbe u boogo dhayo.