Madaxweynaha Maamulka Galmudug Axmed Cabdi Kaariye Qoorqoor iyo wafdi uu hogaaminayo ayaa gaaray deegaanka Cada Kibir ee gobolka Galgaduud, deegaankaas oo ay Al-shabaab ka jareen Isgaarsiinta iyo biyaha, kadib markii ay miinooyin ku xereen xarumaha Isgaarsiinta iyo ceel biyood.
Madaxweynaha ayaa warbixinno ka dhageestay guddoomiyaha deegaanka iyo odayaasha dhaqanka, waxuuna halkaas kula kulmay ku dhawaad 150 qof oo dadka deegaanka ah, kuwaas oo iskood isku hubeeyay si ay iskaga difaacaan Al-shabaab.
Madaxweyaha ayaa sidoo kale sheegay in dadka Soomaaliyeed iyo waxa loogu yeero argagixisadu aysan Soomaaliya kuwada noolaan karin, loona diyaar garoobo sidii la isaga kicin lahaa, looguna tagi lahaa deegaanada kooban ee ay ka joogaan Galmudug iyo guud ahaan Soomaaliya.
Madaxweynaha ayaa ugu danbayn ku boggaadiyey shacabka iyo culimada deegaanka Cada Kibir sida ay ugu diyaar garoobeen inay Al-shabaab uga difaacdaan deegaankooda iyo deegaanada hoostaga, waa sida uu hadalka u dhigay.
Sidoo kale Madaxweynaha Maamulka Galmudug Axmed Cabdi Kaariye Qoorqoor ayaa xusay Galmudug ay had iyo goor garab taagantahay shacabka u hiillan inay iska dulqaadaan Al-shabaab.
