Iyadoo Guddiga FIET ay go’aan kasoo saareen doorashada kuraasta Gedo, sheenna in lagu qaban doono Ceelwaaq, ayaa waxaa si weyn uga hor yimid oo sharci darro ku tilmaamay maamulka gobolka Gedo.
Guddoomiyaha maamulkaas Axmed Buulle Gareed oo BBC-da la hadla ayaa sheegay inay ku taagan yihiin Heshiiskii 17 September. “Garbahaarrey Heshiiskii 17 September ayay ka mid tahay, xildhibaannada saakay la dhaarinayay waxa lagu dhaariyay waa 17 September, kuwa dhiman waxa lagu soo dooranayaana waa 17 September, cid hal qodob ka beddeli karta ma jirto, shalayna waan taagneyn haddana waan taagannahay,”ayuu yiri.
Buulle Gareed ayaa ku eedeeyay Guddiga FEIT inaysan habeysneyn oo ay dhowr garab noqotay. “Waxaan ku xaqiijinayaa in haddii warqaddaas ay xaqiiq noqoto aan Garbahaarrey ku dooran doonno xildhibaannadii dhinnaa oo ay doorashada Garbahaarrey ka dhacayso,” ayuu yiri.
Wuxuu sheegay in markii horeba aan lagu heshiin waayin in doorashada ay Garbahaarrey ka dhacdo, isla markaana ay ku jirtay qodobbada heshiiskii 17 September, wuxuuna sheegay inaysan u dulqaadan doonin arrintaas ana doorashada qabsan doonaan.
“Aniga waxaan rabaa ninka ragga ah ee Ceelwaaq doorasho ku qabanaya. Annagu sharci baan qabbaan u nahay, sharciga haddii lagu xad gudbay cid aan qabban u nahay ma jirto, doorashadeennana waan qabsaneynaa, iyadoo xor iyo xalaal ah ayaan qabsaneynaa, cid aan magacn uga nahayna ma laha.” Ayuu yiri Guddoomiyaha maamulkaas Axmed Buulle Gareed.