Ciidanka Xoogga dalka gaar ahaan Ururka 45-aad Guutada 8-aad qeybta 60-aad ayaa sheegay inay ka hortageen xubin ka tirsan Al-shabaab oo doonayay inuu miino ku aaso degaanka Goof-guduud ee Gobolka Baay ee Maamulka Koonfur Galbeed.
Saraakiisha Ciidamada qeybta 60-aad ee Xoogga dalka ayaa xaqiijiyay in la hortegay miinadaasi Al-shabaab ay doonayay inay ku dhibaateeyaan shacabka degaanka Goof-guduud ee Gobolka Baay.
Ciidanka ayaa sidoo kale gacanta ku dhigay mootada nooca laba lugooleeyda ee Fekonta loo yaqaan oo uu watay xubin ka tirsanaa Al-shabaab oo ay la qaraxday miinada uu aasi rabay, waa sida hadalka u dhigeen Saraakiisha Ciidamada qeybta 60-aad.
Degaanka Goof-guduud ee Gobolka Baay ee Maamulka Koonfur Galbeed ayaa ah deegaan ay marar badan ka dhaceen dagaal u dhexeeyay Ciidanka dowladda iyo Al-shabaab oo weeraro ku qaaday deegaankaas, kuna qabsaday weeraro, in kastoo laga saaray.
