Faah faahino ayaa laga helayaa shil sababay dhimasho iyo dhaawac oo duhurnimadii Maanta ka dhacay deegaanka Labi Hiiraan ee duleedka dagmada Matabaan ee Gobolka Hiiraan.
Dad ayaa waxaa kusoo warrameen in shilka uu ka dambeeyay, kadib markii gaari nooca Probox ah oo ay saarnaayeen dad shacab ah, kun socday xawaare sare uu mar qura ka baxay wadada laamiga ah, isla markaana uu burburiyey guri ku yaalla laamiga dhinaciisa.
Inta la xaqiijiyey afar ruux ayaa ku dhaawacmay Shilka, halka ay jiraan dad ku dhintay shilkaas gaari ee Maanta ka dhacay deegaanka Labi hiiraan ee duleedka dagmada Matabaan ee Gobolka Hiiraan, waxaana dadka dhaawacmay la geeyay Isbitaal.
Deegaano iyo degmooyin ka tirsan Gobolka Hiiraan ayaa waxaa mararka qaarkood ka dhaca shilal kala duwan oo khasaaro geystay, iyadoona intab badan shilalka ay ku yimaadan gaadiidka oo xawaare loo wada iyo waddooyinka oo burbursan.
