Guddiga hirgelinta doorashada Maamulka Koonfur Galbeed ee SEIT ayaa Maanta jimco ah shaaciyay qaar kamid ah kuraasta deegaan doorashadoodu tahay Magaalada Baydhabo ee Xarunta Gobolka Baay, ahna Caasimadda KMG ah ee Maamulkaas.
Qoraal ay soo saareen Guddiga doorashada ayaa waxaa lagu sheegay inay qabanayaan doorashada Lix kursi oo kamid ah kuraasta Golaha Shacabka Baarlamaanka 11-aad ee dowladda Federaalka Soomaaliya
Guddiga doorashada Koonfur Galbeed ayaa maalmaha soo socda shaacin doona Jadwalka doorashada lixda kursi ay soo saareen, waxaana sidoo kale Guddiga laga sugayaa soo bandhigista Liiska Odayaasha dhaqanka iyo Bulshada Rayidka ee soo xulaya ergada wax dooraneysa.
Magaalada Baydhabo ee Xarunta Gobolka Baay ayaa waxaa maalintii shalay oo khamiis aheyd lagu qabtay doorashada lix kursi oo kamid ah kuraasta Golaha Shacabka, waxaana Maamulka Koonfur Galbeed uu yahay maamul si dardar leh u wada doorashada.
