Madaxweyne ku-xigeenka Koowaad ee dowlad Goboleedka Jubbaland Maxamuud Sayid Aadan ayaa daahfuray kulankii Koowaad ee ay Guddiga uu Ra’iisul Wasaaraha xilgaarsiinta u xilsaaray qiimeeynta xaaladda deegaan doorashada labaad ee Jubaland Garbahaarey ay la yeeshaan siyaasiyiinta Jubbaland ee kasoo jeeda Gobolka Gedo.
Wakiilada ayaa Gudidga qiimeynta u gudbiyey warbixin soo koobeeysa caqabadaha ku xeeran in doorasho lagu qabto deegaan doorashada labaad Magaalada Garbahaareey ee Xarunta Gobolka Gedo ee koonfurta Soomaaliya iyo xaaladda amni ee ka jirta halkaas.
Madaxweyne ku-xigeenka Jubbaland oo kulanka ka hadlaayay ayaa waxaa uu sheegay in latashiyo ku aadan xaaladda Garbahaareey ee yeesheen, isla markaana ay doonayaan in Magaaladaas ka dhacdo doorashada kuraasta Golaha Shacabka ee taalla.
Wuxuu tilmaamay Maxamuud Sayid in Guddiga qiimeynta ay ku wareejin doonaan Dukumeentiyo ay ka qoreen caqabadaha heysta Garbahaareey, isagoona xusay inay caddeeyeen sababta ka hortaagan in Magaaladaas lagu qabto doorashada.
Furitaanka kulanka ayaa waxaa goobjoog ka ahaa Wakiilada labada gole ee dowlad Goboleedka Jubbaland oo deegaan doorashadoodu tahay Gobolka Gedo, xubno ka tirsan Aqalka sare iyo siyaasiiyiin ka soo jeeda Gobolka Gedo ee Maamulka Jubbaland.
