Guddiga Xallinta Khilaafaadka Doorashada Dadban ayaa shaaciyay inuu muddo dheeraad ku daray baarista dacwada laga soo gudbiyey kursigii uu ku fadhiyey Wasiirka Batroolka Xukuumadda xilgaarsiinta, kaasi oo doorashadiisa dhawaan ka dhacday Magaalada Baraawe.
Qoraal kasoo baxay Guddiga Xallinta Khilaafaadka ayaa waxaa lagu sheegay in muddo shan maalmood ah ku dareen baarista dacwada kursiga Golaha Shacabka ee tirsigiisu yahay HOP045 oo dhawaan kusoo baxay nin lagu magacaabo Maxamuud Axmed Maxamed.
Guddiga Xallinta Khilaafaadka Doorashada Dadban ayaa Guddiyada heer Federaal iyo kuwa Maamulka Koonfur Galbeed ka dalbaday inay tixgeliyaan duruufaha jira iyo xog uruurinta uu Guddiga wado, isla markaana lagu ogaanayo baarista dacwada laga soo gudbiyey kursiga HOP045.
Kursigan oo doorashadiisu ka dhacday degmada Baraawe ayaa dhawaan loo diiday inuu u tartamo Wasiirka Batroolka Xukuumadda Soomaaliya Cabdirashiid Maxamed Axmed, isagoo dacwad ka gudbiyay Musharaxii ku guuleystay ee Maxamuud Axmed Maxamed.
