Madaxweynaha dowlad Goboleedka Jubbaland Axmed Maxamed Islaam Axmed Madoobe, ayaa maanta shir guddoomiyay kulanka Golaha wasiirada oo lagaga hadlay qodobo kala duwan, kaasi oo ka qabsoomay Magaalada Kismaayo.
Ugu horayn golaha ayaa si wadajir ah guud ahaan shacabka Soomaaliyeed uga tacsiyeeyay geerida alle ha u naxariistee sheekh Cabdinaasir Xaaji Axmed oo dhawaan ku geeriyooday Kismaayo, isla markaana lagu dilay qarax loogu xiray gaarigiisa.
Wasaarada amniga ayaa faahfaahin ka bixisay xaalada amniga iyo howlgalada hay’adaha ammaanka oo ay kamid yihiin sugida amniga magaalooyinka iyo doorashooyinka, wasaaradu waxaa ay sheegtay in howlgal Ciidamada ammaanka ay ka sameeyeen duleedka Degmada Jamaame lagu dilay lix katirsan Al-shabaab ah sidoo kalana lagu soo qabtay tiro maxaabiis ah.
Sidoo kale golahu wuxuu ansixiyay siyaasada nashqadaynta guryaha Jubbaland oo ay kamid yihiin dhismaha guryo tayo leh oo loo dhisayo dadka gudaha ku barakacay iyo dadka kasoo noqonaya xeryaha qoxootiga dhadhaab.
