Ra’iisul Wasaaraha Xukuumadda xilgaarsiinta Maxamed Xuseen Rooble ayaa la kulmay Afhayeenka Xukuumadda Maxamed Ibraahim Macalimuu oo Maanta dib ugu soo laabtay Maagalada Muqdisho, isaga oo dhaawac ahaan markii horey loogu qaaday dalka Turkiga.
Ra’iisul Wasaare Rooble ayaa Afhayeen Macalimuu ka xog-wareystay xaaladdiisa Caafimaad iyo qaabkii dhaqaatiirta dalka Turkiga ugala tacaaleen dhaawaca kasoo gaaray qaraxii Is-miidaaminta ahaa ee 16-kii Janaayo 2022 lagula beegsaday Muqdisho.
Ra’iisul Wasaaraha xilgaarsiinta ayaa Afhayeen Macallimuu u muujiyay sida uu ugu faraxsan yahay in uu ka bogsooday dhaawacii kasoo gaaray qaraxii lala beegsaday, una rajeeyay in uu ku guuleysto dadaalladiisa uu ku doonayo in uu dalkiisa ugu adeego.
Afhayeenka Xukuumadda ayaa ka mahadceliyay soo dhaweynta loo sameeyay, wuxuuna sidoo kale farriin mahadnaq ah u diray shacabka Soomaaliyeed iyo Ra’iisul Wasaare Rooble oo uu xusay inuu garab istaag weyn u muujiyey markii uu dhaawacmay.
Maxamed Ibraahim Macalimuu ayaa 16-kii Janaayo 2022 lala beegsaday qarax Is-miidaamin ah oo uu fuliyey qof isku soo xiray Jaakad waxyaabaha qarxa ah, waxaana soo gaaray dhaawac, isagoona loo qaaday dalka Turkiga oo xaaladdiisa Caafimaad lagu soo daaweeyay.
