Afhayeenka Xukuumadda Federaalka Soomaaliya Maxamed Ibraahim Macalimuu ayaa Maanta oo Arbaco ah lagu wadaa inuu yimaado Magaalada Caasimadda ah ee Muqdisho, isagoo ka imaanaya Magaalada Istanbuul ee dalka Turkiga.
Macalimuu ayaa dhaawac ahaan loogu qaaday Turkiga, si xaaladdiisa Caafimaad loogu soo dabiibo, kadib markii 16-ka bishii Janaayo ee sanadkaan 2022 uu ku dhaawacmay Qarax Is-miidaamin ah oo lagula beegsaday meel ku dhow Isgoyska Dabka ee Muqdisho.
Afhayeenka Xukuumadda Federaalka Macalimuu oo ka jabay gacan iyo lug ayaa laga daaweeyay dhaawacii kasoo gaaray qaraxii lala beegsaday oo firiro kale gaarsiiyay, isagoona muddo ku dhow laba bil ku jiray Isbitaal ku yaalla Magaalada Istanbuul.
Maxamed Ibraahim Macalimuu oo ah Musharax u taagan kursi kamid ah kuraasta Golaha Shacabka Baarlamaanka 11-aad ee dowladda Federaalka Soomaaliya ayaa lagu wadaa in saacadaha soo socda ee Maanta uu yimaado Magaalada Muqdisho.
Qaba-qaabada soo dhaweynta Afhayeenka Xukuumadda Macalinka ayaa ka socoto Garoonka diyaaradaha Aadan Cadde ee Muqdisho, waxaana soo dhaweyntiisa ka qeyb galaya Mas’uuliyiin ka tirsan dowladda Federaalka, Suxufiyiin iyo xubno kale.
