Guddiga Xallinta Khilaafaadka doorashada ayaa hakiyay ku dhawaaqista natiijada kursiga Golaha Shacabka HOP#45 oo maalmo kahor lagu doortay Magaalada Baraawe, uuna ku fadhiyey Wasiirka Batroolka Xukuumadda xilgaarsiinta Cabdirashiid Maxamed Axmed.
Guddiga Xallinta Khilaafaadka oo Qoraal soo saaray ayaa waxaa lagu sheegay in kusriga tirsigiisu HOP#45 ay dacwad kasoo gudbiyeen saddex xubnood oo uu ku jiro Wasiirka Batroolka, xili kursigaas uu kusoo baxay Maxamuud Axmed Maxamed oo la doortay.
Guddiga Khilaafaadka ayaa Guddiga doorashada heer Federaal iyo kuwa Koonfur Galbeed ka dalbaday inay hakiyaan ku dhawaaqista natiijada kursiga Golaha Shacabka HOP#45, ayna baaris ku sameeyn doonaan kursiga oo dacwad laga soo gudbiyey.
Guddiga Xallinta Khilaafaadka ayaa horey Go’aano uga gaaray dacwado laga soo gudbiyey kuraas ka tirsan Golaha Shacabka Baarlamaanka 11-aad oo la doortay oo ay kusoo baxeen Musharaxiin, kadib baaris Guddiga ku sameeyeen hannaanka loo maray doorashada kuraastaas.
