Warar dheeraad ah ayaa kasoo baxaya qarax xoogan oo galabta ka dhacay Magaalada Boosaaso ee Xarunta Gobolka Bari gaar ahaan Maqaayad ku taalla wadada aada Garoonka diyaaradaha Magaalada, kuna dhow Aargada Maqaska.
Dad ayaa waxaa ay ku warrameen in qaraxa uu ahaa miino nooca dhulka lagu aaso ah ee laga hago meelaha fog-fog, waxaana la sheegay in lala beegsaday Nabaddoono iyo dad kale oo u badan Rag, kuwaasi oo ku sunaa Maqaayada uu qaraxaas ka dhacay Maanta…
Inta la xaqiijiyay hal qof ayaa ku geeriyooday qaraxa, halka dhowaad 10 qof kalena ay ku dhaawacmeen qaarax ka dhacay Maqaayada, waxaana dadka dhaawacmay durbadii la geeyay Isbitaalka Magaalada, si xaaladdooda Caafimaad loogu dabiibo.
Dadka wax yeelada kasoo gaartay qaraxa miinada ahaa ayaa waxaa la sheegay inay ku jiraan Nabadoono shalay ka qayb galay kulan lagu taageerayey Wasiirka Qorshaynta Xukuumadda Federaalka ee xilgaarsiinta Jamaal Maxamed Xasan.
Magaalada Boosaaso ee Xarunta Gobolka Bari oo isu diyaarinaysa doorashada 16-ka kursi ee deegaan doorashadoodu tahay ayaa todobaadyadii lasoo dhaafay waxaa ka dhacayey qaraxyo lala beegsanayo meelaha laysugu yimado.