Faah faahino ayaa laga helayaa Dagaal u dhexeeyay Ciidanka Booliska dowladda ee sida gaarka u tababaran ee Haramcad iyo kuwa Booliska Maamulka Hirshabeelle oo saakay ka dhacay Magaalada Baladweyne ee Xarunta Gobolka Hiiraan.
Dagaalkaan ayaa waxaa uu ka dambeeyay, sida ay dad la hadlay Idaacadda Dalsan u sheegeen, kadib markii Saldhiga Booliska Magaalada Baladweyne lagu xiray Boqolaal ruux oo lagu soo qabtay Howlgalo xalay ilaa saaka laga sameeyey Xaafada Buunda-weyn.
Khasaaro isugu jiray dhimasho iyo dhaawac ayaa ka dhashay dagaalka dhexmaray Ciidanka Haramcad iyo kuwa Hirshabeelle, waxaana la xaqiijiyay inuu dagaalka ku dhintay Taliyahii Saldhiga Booliska Baladweyne laba Xidigle Maxamed Xuseen Maxamuud Duur-jooge.
Dadkii lagu soo qabtay howlgalka ayaa saakay la geeyey Saldhiga Booliska Magaalada Baladweyne, si halkaasi loogu xiro, waxaana xiritaanka dadkaasi ka dhashay inta uu socday iska hor-imaadka uu ku dhintay Taliye Duurdage, sidoo kalena dhaawacyo ay jiraan,
Xiisad u dhexeeyso labada Ciidan ayaa ka taagan saldhiga Booliska Baladweyne, xili Magaaladaas uu ku sugan Madaxweynaha dowlad Goboleedka Hirshabeelle Cali Cabdullaahi Xuseen Cali Guudlaawe iyo ku-xigeenkiisa oo kulamo wada.