Ra’iisul Wasaaraha Xukuumadda Federaalka Soomaaliya ee xilgaarsiinta Maxamed Xuseen Rooble ayaa Maanta oo Arbaco ah kulan deg deg ah isugu yeeray Hay’addaha kala duwan ee ammaanka dowladda Federaalka.
Kulanka ayaa waxaa looga hadlay xaaladihii ugu dambeeyay ee amniga dalka iyo weeraradii khasaaraha dhaliyey ee xalay ka dhacay Magaalada Muqdisho gaar ahaan Saldhiga degmada Kaxda iyo deegaanka Daaru-salaam ee Gobolka.
Ra’iisul Wasaare Rooble ayaa Saraakiisha Booliska dowladda ka dhageystay Warbixino ku aadan xaaladda amniga Caasimadda iyo qorshaha lagu xoojin karo ammaanka, xili falal amni darro ay maalmihii dambe kusoo bateen Magaalada Muqdisho.
Ra’iisul Wasaaraha Xukuumadda Federaalka Soomaaliya ee xilgaarsiinta Maxamed Xuseen Rooble ayaa faray hay’adaha amniga in ay qaadaan tallaabooyin dheeri ah oo lagu xoojinayo amniga, isla markaana la xoojiyo sugida amniga Caasimadda.
Kulankaan uu Rooble isugu yeeray Saraakiisha amniga ayaa kusoo aaday, iyada oo xalay  Al-shabaab weeraro ku bilowday qaraxyo ku qaadeen Saldhiga degmada Kaxda iyo deegaanka Daaru-salaam ee Gobolka Banaadir, kuwaasi oo sababay dhimasho iyo dhaawac…
Saddex qof ayaa ku geeriyooday weeraradii ka dhacay Magaalada Muqdisho, halka 16 qof kalena oo ay ku jiraan Askar ka tirsan Ciidanka Booliska iyo Milateriga ay ku dhaawacmeen weerarada, sidoo kalena waxaa burburay dhismayaal farabadan..
