Guddiga doorashada Maamulka Hirshabeelle ayaa habeenimadii xalay aheyd shaaciyay liiska kuraasta ugu horreeysa ee Golaha Shacabka Baarlamaanka 11-aad ee dowladda Federaalka, kuwaasi oo yaalla Magaalada Baladweyne ee Xarunta Gobolka Hiiraan.
Qoraal ay soo saareen Guddiga hirgelinta doorashada Hirshabeelle ayaa lagu soo bandhigay Liiska kuraasta Golaha Shacabka ee taalla Baladweyne, waxaana lasii daayey 13 kursi oo kamid ah kuraasta Golaha Shacabka Baarlamaanka Jamhuuriyadda.
Kuraasta lasii daayay ayaa waxaa ku jira kursiga tirsigiisu yahay #HOP086 oo afartii sanno ee lasoo dhaafay uu ku fadhiyo Xildhibaan Faarax Sheekh Cabduqaadir, waxaana Musharaxiinta haatan dooneysa kuraasi ku jiro Fahad Yaasiin oo ah Taliyaha dhinaca  amniga Madaxweynaha muddo xileedkiisa dhammaaday ee Farmaajo.
Guddiga doorashada Hirshabeelle ayaa waxaa lagu wadaa inay shaaca ka qaadan Jadwalka doorashada kuraastan lasoo saaray ee doorashadooda lagu qaban doono Magaalada Baladweyne ee Xarunta Gobolka Hiiraan,
Hirshabeelle ayaa noqotay markii labaad ee bilaabaya deegaan doorashada labaad ee horey loo qorsheeyay, waxaana horey u bilaabay Maamulka Koonfur Galbeed Soomaaliya oo Magaalada Baraawe ku qabtay doorashada 13 kursi.
