Guddiga amniga Gobolka Nugaal ee Maamulka Puntland ayaa Maanta gaadiidka Mooto Bajaajta ka mamnuucay inay maraan wadada halbowlaha u ah Magaalada Garoowe ee Caasimadda dowlad Goboleedka Puntland.
Ciidamada ammaanka Maamulka ayaa sameeyay howlgal lagu soo uruuriyey gaadiidka Mooto Bajaajta ee mareysay wadada halbowlaha u ah Magaalada Garoowe, waxaana Ciidanka ay xareeyeen Mooto Bajaaj badan.
Guddiga amniga Gobolka Nugaal ee Puntland oo Maanta shir gaar ah yeeshay ayaa soo saaray Go’aanka lagu wadada looga mamnuucay wadada halbowlaha ah, iyadoona Guddiga isku raacay in Ganaaxo la dul-dhigo cidii lagu soo qabto arrintaas.
Sababta gaadiidleyda Mooto Bajaajta loogu diiday inay isticmaalan wadadaas ayaa lagu sheegay inay tahay Shilalka Bajaajta oo ku batay halkaas, isla markaana waxaa shilalka qaarkood ka dhasha khasaaro kala duwan.
Taliyaha qaybta Booliska Gobolka Nugaal G/Sare Xussen Cali Maxamuud ayaa sheegay in Bajaajtii lagu soo qabto Isticmalka wadada wayn tallaabo sharci ah, lana Ganaaxi doono Darawalka wada Mootada la qabto.