Madaxweynaha muddo xileedkiisa dhammaaday ee Maxamed Cabdullaahi Farmaajo ayaa ka qeyb galay Meertada 35-aad ee Shir Madexeedka Ururka Midowga Afrika oo maanta oo sabti ah ka furmay Xarunta Midowga Afrika ee Magaalada Addis Ababa.
Shirweynahan ayaa waxaa ka qayb galaya Hoggaamiyeyaasha dalalka Afrika, Madax ka socota ururrada iyo hay’adaha caalamiga ah, iyo korjoogto kale, kuwaasi oo intooda badan ka jeedin doona khudbado kala duwan oo ay hadlayaan Arrimo dhowr ah.
Shirka oo ilaa berri sii socon doona, ayaa waxaa Madaxweyne Farmaajo iyo Wafdigiisu ay ku soo bandhigi doonaan halkaas, aragtida Dowladda Federaalka Soomaaliya ee ku aaddan mustaqbalka Qaaradda Afrika iyo dadaalada Soomaaliya ee ku wajahan la dagaallanka waxa loogu yeero argagixisada.
Sidoo kale khudbad uu Madaxweynaha muddo xileedkiisa dhammaaday ka jeedin doono Shirka Midowga Afrika ayuu uga hadli doonaa ka soo kabashada saamaynta COVID-19, wax ka qabashada fatahaadaha, ka gaashaamashada abaaraha iyo la dagaallanka ayaxa, kuwaas oo ah khataro ay wajahayso Qaaradda Afrika.
Farmaajo ayaa inta uu ku sugan yahay Magaalada Addis Ababa ee Caasimadda dalka Itoobiya waxaa uu kulamo kala duwan la qaadan doonaa Madaxda qaar ee ka qeyb galeysa Meertada 35-aad ee Shir Madexeedka Ururka Midowga Afrika.
