Madaxweynaha muddo xileedkiisa dhammaaday ee Maxamed Cabdullaahi Farmaajo iyo wafdi uu hoggaaminayo ayaa Goordhow ka ambabaxay Garoonka diyaaradaha Aadan Cadde ee Muqdisho, iyagoona kusii jeeda Magaalada Addis Ababa ee dalka Itoobiya.
Farmaajo ayaa Caasimadda Addis Aabab kaga qeyb galaya meertada 35-aad ee Shirweynaha Ururka Midowga Afrika oo halkaas ka furmaya, waxaana Magaaladaas uga sii horreeya Wasiirka Arrimaha Dibadda xilgaarsiinta Cabdisaciid Muuse Cali.
Shirweynahan oo ay ka qayb galayaan Hoggaamiyeyaasha Dalalka Afrika iyo madax kale, ayaa looga arrinsanayaa dib-u-habaynta Ururka Midowga Afrika, hirgelinta hiigsiga Ururka ee sannadda 2063.
Sidoo kale meertada 35-aad ee Shirweynaha Ururka Midowga Afrika ayaa looga arrinsadan doonaa wax ka qabashada caqabaha kala duwan ee ay Qaaraddu wajahayso oo ay ugu horreeyaan rabshadaha, saboolnimada, cunno yarida iyo cudurka COVID-19.
Madaxweynaha muddo xileedkiisa dhammaaday ee Maxamed Cabdullaahi Farmaajo ayaa inta uu ku sugan yahay Magaalada Addis Ababa waxaa uu kulamo kala duwan la yeelan doonaa Madaxda qaar ee ka qeyb galay Shirweynaha Ururka Midowga Afrika.
