Kolonyo ay la socdeen Ciidamo ka tirsan kuwa Itoobiya ee qeybta ah howlgalka AMISOM ayaa waxaa qarax xoogan lagula eegtay degaan ka tirsan Gobolka Hiiraan ee Hirshabeelle, waxaana kasoo baxaya faah faahino qaraxaas dhacay.
Qaraxa oo ahaa miino nooca dhulka lagu aaso ah ayaa waxaa gaadiidka ay wateen Ciidamada Itoobiya lagula beegsaday inta u dhexeeysa deegaanada Ceelgaal iyo Kalabeyrka ee Gobalka Hiiraan, xili ay halkaas socdaal ku marayeen.
Al-shabaab warar ay ku qoreen barahooda qadka Internet-ka ayaa waxaa ay ku sheegteen mas’uuliyada qaraxa lala eegtay Ciidanka Itoobiyaanka ahaa, iyagoona tilmaamay inuu burburay mid kamid ah gaadiidkii kolonyada oo uu qaraxu haleelay.
Shabaabta intaas kusii daray in Ciidamada Itoobiya ee la qarxiyey ay kasoo baxeen Magaalada Baladweyne, isla markaana ay doonayeen sahay ciidan oo taallay xadka kala qeybiya Hiiraan iyo Itoobiya, waxaana qaraxa ka dhashay khasaaro dhimasho iyo dhaawac.
Si kastaba Al-shabaab ayaa marar kala duwan sidaan oo kale waxaa ay qaraxyo khasaaro dhaliyey ula beegsadeen Ciidamo ka tirsan Itoobiya ee qeybta ah howlgalka AMISOM, sidoo kalena ay labada dhinac dhexmareen dagaal xoogan oo ka dhacay qeybo kamid ah dalka.
