Ciidanka Booliska Maamulka degmada Kaaraan ee Gobolka Banaadir ayaa xalay xaafaddo ka tirsan degmadaas ka fuliyay howlgalo lagula dagaalamayo kooxaha burcada ee dhaca u geystay dadka deegaanka degmada iyo Ciyaal weerada dhibaatada wada.
Inta uu socday howlgalka Ciidamada ayaa waxaa ay iska horimaad kooban uu Kaaraan ku dhexmaray Ciidanka Booliska dowladda iyo koox hubeysan oo burcad ah, kuwaasi oo dhac u gaysanayey xiliga Israsaaseynta dhaceysay dad shacab ah.
Dad ayaa waxaa ay ku warrameen in Ciidanka ammaanka ay toogasho ku dilay mid kamid ah kooxdii burcada aheyd, waxaana sidoo kalen uu dhac fudud soo gaaray Taliye ku-xigeenka Booliska degmada Kaaraan Daa’uud Dalmar.
Ciidanka Booliska ee howlgalka waday ayaa gacanta kusoo dhigay koox Ciyaal weero oo dhibaato ku haaya dadka shacabka ah ee degmada, kuwaasi oo ku hubeysan Mindiyo iyo waxyaabo kale oo dadka dhibaato loogu geysan karo, iyadoona kuwa la qabtay la xiray.
Degmada Kaaraan ee Gobolka Banaadir ayaa waxaa muddooyinkii dambe kusoo badanayey kooxo burcad ah oo dadka ka qaatay Moobeelada gacanta iyo waxyaabaha kale ee muhiimka ay wataan, halka sidoo kalena degmadaas ay ka jiraan kooxo dhalinyaro Ciyaal weero ah oo dadka ay cabasho ka muujiyeen.