Warar dheeraad ah ayaa kasoo baxaya Israsaaseyn socotay daqiiqado kooban oo habeenkii xalay aheyd ka dhacday Magaalada Garoowe ee Xarunta Gobolka Nugaal, taasi oo u dhexeeysay Ciidamo ka wada tirsan Maamulka Puntland.
Dad ku sugan Garoowe oo la hadlay warbaahinta ayaa u sheegay in Israsaaseynta dhacday ay si gaar ah u dhexmartay Ciidamo ka tirsan kuwa Ilaalada Madaxweyne ku-xigeenka Puntland Axmed Karaash iyo Ciidamo Taraafiko ah oo ku sugnaa Xaruntooda.
Israsaaseynta ayaa ka bilaabatay, kadib markii uu muran ka dhashay gaari ay lahaayeen Ciidanka Madaxweyne ku-xigeenka Puntland Axmed Cilmi Cismaan Karaash oo lagu xareeyay Xarunta Ciidanka Taraafikada ee Garoowe, sidaasina rasaasta ku dhacday.
Laba Askari oo ka tirsan kuwa Booliska Puntland ayaa ku dhaawacmay Israaseynta dhacday, kuwaasi oo la geeyay Isbitaal, si loogu daaweyo, mana jiro weli wax war ah oo kasoo baxay Laamaha amniga Puntland oo ku aadan falkaas dhacay.
Wararka ayaa intaas waxaa ay kusii darayaan in Afar askari oo ka tirsan Ciidanka Madaxtooyada Puntland loo xiray dhacdadaas, isla markaana waxaa ku socda baaritaano ku aadan qaabka ay u dhacday Israsaaseynta.
