Xiisad ayaa weli ka taagan Gobolka Galgaduud, kaddib markii shalay ciidamo ka tirsan Ahlusunna ay qabsadeen Magaalada Guriceel ee Galgaduud, Khamiistiina uu dagaal culus ka dhacay deegaanka Bohol oo qiyaastii 30 KM u jira magaalada Dhuusamareeb.
Hoggaamiyaha Ahlusunna Waljameeca Sheekh Maxamed Shaakir Cali Xasan oo wareysi gaar ah siiyay BBC-da ayaa sheegay in maamulka Galmudug meeshii uu la dagaallami lahaa Al-Shabaab ay soo weerareen Ahlusunna
Wuxuu sheegay Sheekh Shaakir in ujeedkooda ugu weyn ee ay u joogaan Gobolka Galgaduud ee uu yahay la dagaallanka Al-shabaab iyo in la hagaajiyo wixii ka khaldan sida uu sheegay maamulka Galmudug ee uu hoggaamiyo Madaxweyne Qoorqoor.
Dagaal u dhexeeyay Ciidamada dowladda Federaalka, kuwa Galmudug iyo Ciidanka Ahlusunna ayaa maalmo kahor ka dhacay degaanka Bohol ee duleedka Magaalada Dhuusamareeb, waxaana dagaalkaas ku geeriyooday in ka badan 10 qof.
Ciidanka Ahlusunna Waljameeca ayaa duhurnimadii dagaal la’aan qabsaday Magaalada Guriceel, kadib markii halkaas ay isaga baxeen Ciidanka dowladda iyo kuwii Galmudug ee joogay, iyadoona Ahlusunna mamnuucday in Garoonka Guriceel kasoo degto diyaarad sida hub iyo Ciidan.
Hoggaanka Ahlusunna ee Macalin Maxamuud Sheekh Xasan iyo Sheekh Maxamed Shaakir oo mudo ka maqnaa deegaanada Galmudug ayaa dhawaan halkasai dib ugu laabtay, waxa ayna durba bilaabeen abaabul ay ku doonayaan in mar kale dib ula wareegaan deegaanadii horey looga saaray maamulkooda.