Wararka aan ka heleyno inta u dhexeeysa degmada dhagaxbuur iyo Magaalada Jigjiga ee Xarunta dowlad deegaanka Soomaalida Itoobiya ayaa waxaa ay sheegayaan in halkaas saakay uu ka dhacay Shil gaari oo khasaaro dhaliyey.
Shilkaan ayaa waxaa uu ka dambeeyay, ka gadaal markii ay isku dhaceen laba gaari oo ku socday xawaare sare oo mid uu ahaa Bas, xili ay iska hor yimideen, wuxuuna sigaar ah Shilka uga dhacay inta u dhexeeysa dhagaxbuur iyo Magaalada Jigjiga.
Inta la xaqiijiyay hal qof ayaa ku geeriyooday Shilkaas dhacay, halka Afar qof kalena dhaawacyo soo gaareen, kuwaasi oo durbadiiba ay gurmad u sameeyeen dad goobta ka Agdhawaa, iyagoona geeyay Isbitaal.
Sawirro lasoo qaaday ayaa muujiyay burbur gaaray gaadiidka isku dhacay ee ku socday xawaaraha dheereeya, isla markaana waxaa goobta Shilka ka dhacay tegay Ciidanka Ilaalada waddooyinka ee dowlad deegaanka Soomaalida oo labada gaari jiiday.
Dhowr mar oo horey ayaa sidaan oo kale waxaa ay shilal uga dhaceen deegaano iyo Magaalooyin ka tirsan dowlad deegaanka Soomaalida Itoobiya, waxaana inta badan shilalka loo sababeeyay darawalada oo gaadiidka xawaare ku wada.
