Doorashada kuraasta labaad iyo midka saddexaad ee Aqalka Sare ee Baarlamaanka Federaalka Soomaaliya ayaa Caawa ka dhacday Magaalada Jowhar ee Xarunta Gobolka Shabeellaha Dhexe.
Doorashada kursiga labaad ee Aqalka Sare ayaa waxaa ku tartamay laba Musharax oo kala ah Nuur Maxamed Geedi Canjeex iyo Maxamed Cusmaan Dhega-Juun oo afartii sano ee la soo dhaafay ka mid ahaa senatarada Aqalka Sare ee Baarlamaanka.
Nuur Maxamed Canjeex ayaa markii ugu horeysay ka mid noqday Senatarada Aqalka Sare, isagoona ka guuleystay Dhega-Juun, wuxuuna Musharax Nuur helay codad gaaraya 70 Cod, halka Maxamed uu isna helay 27 Cod.
Sidoo kale Fartuun Cabdulqaadir Faarax Karaama ayaa Cod gacan taag ah ku kusoo baxday, ka dib markii ay u tanaasushay Sacdiyo Yarow oo la tartameysay.
Kursigii ugu horreeyay ee doorashada Aqalka Sare ee Hirshabeelle ayaa waxaa ku tartamay afar Musharax oo kala ah Muuse Suudi Yalaxow, Axmed Xuseen Caddow Daaci, Cabdullaahi Sheekh Xasan iyo DR. Xasan Caddeey.
Xildhibaanada dowlad Goboleedka Hirshabeelle ayaa Muuse Suudi Yalaxow u doortay mar kale inuu Maamulkaas ku matelo Aqalka Sare ee Baarlamaanka Federaalka, wuxuuna helay codad gaaraya 55 Cod.
