Madaxweynihii hore ee dalkaasi, Xamiid Karazai waxa uu maanta la kulmay Anas Xaqaani oo ka mid ah Hoggaanka Sare ee Daalibaan, ahna xubin ka tirsan Xafiiska Siyaasadda ee Daalibaan ku leeyihiin Caasimadda dalka Qatar ee Doha iyo Hoggaamiye Sare oo ka tirsan Shabakadda Xaqaani.
Sarkaal u hadlay Ururka Daalibaan ayaa sheegay inuu kulankaasi qeyb ka yahay dadaalka ay Daalibaan ku dhisi doonto Xukuumad Cusub.
Xaamiid Karasaay waxaa kulankaasi ku wehliyey Madaxa Golaha Dib-u-heshiisiinta Qaran ee Afganistan, Cabdalla Cabdalla, ahna Ergaygii hore ee Nabadda ee Dowladii hore.
Shabakadda Xaqaani oo Saldhig ku leh Xuduudka Pakistan waxay Garab muhiim ka tahay Ururka Daalibaan ee Axadii la soo dhaafay la wareegay Caasimadda dalkaasi ee Kabul.
Kulanka maanta dhex maray Anas Xaqaani iyo Xamiid Karasaay ayaan faahfaahin dheeraad ah laga haynin, balse waxay u badan tahay in looga hadlay Dhismaha Dowlad Cusub oo loo dhan yahay iyo Dhacdooyinkii u dambeeyey ee dalkaasi.
Hoggaanka Daalibaan waxay horey u sheegeen inay dhisi doonaan Dowlad Islaami ah oo ay qeyb ka noqon doonaan Siyaasiyiin Caan ah oo la carabaabin.
