Maxkamadda darajada koowaad ee Magaalada Garoowe ee Caasimadda Puntland ayaa waxaa ay xukuno ku riday rag farabadan oo lagu helay dembi ah inay gudaha deegaanada Puntland gelin jireen maandooriyaha khamriga.
Raggaan la Maxkamadeeyay ayaa waxaa ay tirro ahaan gaarayan ilaa 9 nin oo ka wada tirsanaa Shabakad maandooriyaha khamriga gelin jirtay gudaha Puntland, kuwaasi oo lagu soo qabtay howlgal qorsheysan oo ay fuliyeen Ciidanka amniga Puntland.
Qoraal kasoo baxay Maxkamadda Magaalada Garoowe ayaa waxaa lagu shaaciyay in 9-ka Ninka oo qirtay dembiga lagu helay lagu riday xukun ah min lix sano oo xabsi ah iyo ganaax lacageed oo dhan $1000 Dollar.
Sidoo kale Maxkamadda ayaa sii deysay oo xorriyaddiisa dib ugu celisay eedaysane kale oo lagu waayay wax dembi ah, kaasi oo markii hore kamid ahaa ragga ay soo qabteen Ciidanka ammaanka Puntland ee la Maxkamadeeyay.
Howlgalka lagu qabtay 9-ka Nin ee lagu helay inay gudaha Puntland gelin jireen maandooriyaha khamriga ayaa waxaa laga sameeyay tuulo lagu magacaabo Magacley oo ka tirsan degmada Buurtinle ee Gobolka Nugaal ee Puntland.