Taliska Ciidanka dowladda Mareykanka ee qaaradda Afrika ee loo yaqaano AFRICOM ayaa Maanta gaadiid nooca gaashaaman ku wareejiyay Taliska Ciidanka Xoogga dalka ee Dowladda.
Gaadiidkaan oo loogu tala-galay inay adeegsadaan Ciidamada sida gaarka u tababaran ee Kumaandooska Xoogga dalka ee DANAB ayaa waxaa Taliska AFRICOM kala wareegay Taliye Jeneraal Odawaa Yuusuf Raage iyo Saraakiil kale oo Ciidan.
Saraakiil ka socotay Taliska Ciidanka Mareykanka ee qaaradda Afrika iyo Saraakiil kale oo ka tirsan Ciidanka dowladda Federaalka ayaa goobjoog ka ahaa Munaasabadda wareejinta gaadiidka oo ka dhacday Muqdisho.
Jeneraal Odawaa Yuusuf Raage oo Munaasabada ka hadlay ayaa marka horey u mahadceliyay Taliska AFRICOM, isagoona sheegay in gaadiidkaan ay u adeegsadan Ciidanka DANAB howlgalada ka socda dalka.
Mareykanka ayaa dowladda Federaalka ka taageera dhinaca tababarada Ciidanka iyo sahayda, isla markaana waxaa Ciidanka Mareykanka ay ka qeyb qaateen howlgalo ka dhaqan ahaa Al-shabaab oo laga fuliyay deegaano ka tirsan Gobolada dalka Soomaaliya.
