Guddoomiyaha Magaalada Dhuusamareeb ee Caasimadda Maamulka Galmudug Cabdiraxmaan Cali Maxamed Geeda-qarow ayaa ka hadlay dagaal u dhexeeyay Ciidanka Dowladda iyo Al-shabaab oo saakay ka dhacay deegaan hoostega Dhuusamareeb.
Geedaqarow oo la hadlay warbaahinta ayaa waxaa uu sheegay in dagaalka lagula jiro Al-shabaab uusan weli dhammaan, isla markaana deegaanada Maamulka Galmudug uu kasii socon doono, isagoo boggaadiyay Ciidanka saakay dagaalka la galay Shabaab.
Waxaa uu sheegay Guddoomiyaha Dhuusamareeb in dhaawacyada Askarta ee dagaalkii ka dhacay degaanka Tuula-xaayow loo soo qaadi oono dhanka Magaalada Muqdisho, wuxuuna Caafimaad u rajeeyay dadkii dhaawacmay.
Saraakiil ka tirsan Ciidanka Dowladda ayaa sheegay inay Al-shabaab dagaalka uga dileen in ka badan 10-xubnood, isla markaana ay ka qaateen hub ay waateen, waa sida hadalka u dhigeen Saraakiisha Ciidamada qeybta 21-aad ee Xoogga dalka.
Sidoo kale Ciidanka Dowladda ayaa waxaa la sheegay in dhankooda la gaarsiiyay khasaaro oo laga dilay Askar, waxaana xusid mudan in Isbitaalka Dhuusamareeb la geeyay tobaneeyo qof oo dhaawac ah.
Si kastaba Al-shabaab iyo Ciidanka dowladda ayaa horey ugu dagaalamay duleedka Magaalada Dhuusamareeb ee Caasimadda Galmudug, waxaana halkaas ka dhacay sidoo kale weeraro geystay khasaaro oo Shabaabka la eegteen Ciidanka Xoogga dalka.