Wararka ka imaanaya Magaalada Baydhabo ee Xarunta Gobolka Baay ayaa ku warramaya in Halkaasi xalay lagu dilay Nin Wadaad ah iyo walaalkiis, kadib markii koox hubeysan ay dilka fuliyeen sida wararku sheegayaan.
Marxuumka la dilay ayaa lagu magacaabi jiray Macallin Cali Bashiir Xasan iyo walaalkiis Cabdullaahi Bashiir Xasan, waxaana muddo 21 sano ah uu Imaam iyo mu’addin ka ahaan jiray Masaajid ku yaalla Magaalada Boosaaso ee xarunta ganacsiga maamulka Puntland, waxaana la sheegay in dhowaan uu fasax uga baxay magaalada Boosaaso, islamarkaana safar u aaday degaannada Koonfur Galbeed, waxaana xalay lagu dilay nawaaxiga Baydhabo.
Macallin Cali Bashiir Xasan ayaa si weyn looga yaqaannaa Magaalada Boosaaso, waxaana uu si gaar ah imaam iyo mu’addin uga ahaa Masjidka Al-Nawaawi ee Boosaaso.
Ma jirto wax faah faahin intaa dheer oo ilaa hadda laga helay dilka Macallin Cali Bashiir Xasan iyo walaalkiis Cabdullaahi Bashiir Xasan, sidoo kale laamaha ammaanka Koonfur galbeed kama hadlin, mana jirto cid sheegatay Mas’uuliyadda dilkaasi.
