Warar dheeraad ah ayaa kasoo baxaya weerar Al-shabaab ay saacadihii lasoo ku qaadeen Saldhig Ciidanka dowladda Federaalka Soomaaliya ku leeyihiin degmo ka tirsan Gobolka Shabeellaha Hoose.
Weerarka kadib ayaa waxaa meel ku dhow Saldhiga Ciidanka dowladda ee degmada Awdheegle ka dhacay dagaal u dhexeeyay Ciidanka iyo rag hubeysan oo ka tirsan Al-shabaab, kaasi oo socday muddo kooban.
Khasaaro isugu jira dhimasho iyo dhaawac ayaa ka dhashay dagaalkii dhacay oo la sheegay inuu soo kala gaaray labada dhinac, waxaana ka hadlay dagaalamayaasha Al-shabaab.
Ugu yaraan 5 Askari oo ka tirsan Ciidanka dowladda ayaa lagu dilay weerarkii ka dhacay Saldhiga Awdheegle ee Gobolka Shabeellaha Hoose, kuwaasi oo Shabaabka ku sheegeen inay ahaayeen ciidamada dowladda ee lagu tababaray Saldhiga Turkiga ee Muqdisho.
Saraakiisha Ciidanka dowladda ayaa weli ka hadlin dagaalka iyo weerar ka dhacay Shabeellaha Hoose, iyadoo xusid mudan tahay dhowr mar sidaan oo kale labada dhinac ay dagaalo ugu dhexmareen deegaano ka tirsan Gobolkaas.