Gaadiidka waaweyn ee ah kuwa nooca xamuulka qaado ayaa labadii maalmood ee lasoo dhaafay ku xiran yahay degmada Matabaan ee Gobolka Hiiraan, sida ay sheegayaan wararka aan ka heleyso halkaas.
Dadka deegaanka ayaa ku warramay in gaadiidka xayiran ay yihiin kuwa ka shaqeeya inta u dhexeeysa Hiiraan ilaa iyo Magaalada Boosaaso ee Gobolka Bari, waxaana gaadiidleyda ay ka cabanayaan Canshuur badan oo looga qaado Matabaan.
Mid kamid ah Darwalada Gaadiidkaan oo warbaahinta la hadlay ayaa u sheegay in Galmudug Canshuur uga qaado gudaha Matabaan, isla markaana xubno kale oo sheeganay inay ka tirsan Hirshabeelle ay ka qaadan Canshuur kale.
Gaadiidleyda ayaa tilmaamay in aysan awood badan u laheyn inay bixiyaan lacagta Canshuurta ah ee labada meel looga qaadayo, iyagoona qaar kamid ah gaadiidleyda ay sheegeen inay Canshuurta usii dheer tahay kuwo looga qaado Isbaarooyin.
Dhowr jeer oo horey sidaan oo kale dhacday in gaadiid kuwa nooca xamuulka qaado ah oo siday shixnad kala duwan lagu xayiray deegaano ka tirsan Hirshabeelle iyo Galmudug, wallow markii dambe lasii daayay, kadib dadaalo la sameeyay.