Warar dheeraad ah ayaa kasoo baxaya qarax xoogan oo lala eegtay Ciidamo ka tirsan kuwa Booliska dowladda Kenya, kaasi oo ka dhacay deegaan ka tirsan Magaalada Mandheera ee Gobolka Waqooyi barri ee dalkaas.
Qaraxa oo ahaa miino nooca dhulka la geliyay ayaa waxaa lala eegtay gaari nooca dagaalka oo ay la socdeen Askar badan oo ka tirsan Booliska Kenya, xili ay socdaal ku marayeen deegaanka Lafeey oo katirsan Magaalada Mandheera.
Khasaaro isugu jira dhimasho iyo dhaawac ayaa ka dhashay qaraxaas oo soo gaaray Ciidankii saarnaa gaariga, sida ay sheegayaan dadka deegaanka oo maqlay jugta qaraxa oo ahaa mid xoogan.
Al-shabaab warar ay ku qoreen barahooda dhinaca qadka ayaa waxaa ay ku sheegteen in qaraxa ay ku dileen ugu yaraan 14 Askari oo Keynyaati ah, halka 6 kalena dhaawacyo kala duwan ay soo gaareen, kuwaasi oo loola cararay Xarun Caafimaad
Dhinaca kale Saraakiisha Ciidanka Booliska dowladda Kenya ayaa weli wax war ah kasoo saaran qaraxii lala eegtay Ciidankooda, xili ku socdaalayeen deegaanka Lafeey, kuna sii jeeday deegaano kale oo ka tirsan dalkaas.
Al-shabaab ayaa marar badan qaraxyo iyo weeraro toos ah ku qaaday Ciidamada dowladda Kenya oo ku socdaalayay gudaha Magaalada Mandheera ee Waqooyi barri ee dalkaas, isla markaana waxaa weerarada qaarkood ka dhashay khasaaro kala duwan.