Qaraxii Is-miidaaminta ee xalay ka dhacay Maqaayada lagu iibiyo Jalaata ee Devino ee Magaalada Muqdisho ayaa waxaa ka dhashay khasaaro isugu jiray dhimasho iyo dhaawac oo soo gaaray dad badan oo ku caweynayay halkaas.
Ruux lagu tilmaamay inuu ahaa Odey da’ ah oo watay khamiis ayaa la sheegay inuu qaraxaas fuliyay, isagoo isku soo xiray Jaakad waxyaabaha qarxa, wuxuuna gudaha u galay Maqaayada oo xiliyada habeenkii ah siweyn loo buux-dhaafiyo.
Dhalinyaro ah gaareysa ilaa iyo 8 ayaa ku geeriyooday qaraxii xalay ka dhacay Mgaaalada Muqdisho, isla markaana waxaa dhalinyarada ku jiray Wiil siweyn loo yaqaanay, kaasi oo gelinkii dambe ee shalay ka yimid dalka Itoobiya.
Dhammaan dhalinyaradii qaraxa ku dhintay ayaa ahaa kuwo siweyn looga yaqaanay Baraha bulshada, waxaana geeridooda ay si darraan uga tacsiyeeyay Mas’uuliyiin farabadan iyo qeybaha kala duwan ee Bulshada, iyagoona lagu tilmaamay ahaayeen kuwo aad u firfircoon, isla markaana qaarkood ay la shaqeynayeen Dowladda.
Hoos ka Akhriso Magacyada dhalinyarada geeriyootay.
1 Ibraahim Cabdi
2 Bishaar Cabdiqaadir
3 Cabdullaahi Cabdi Jaamac
4 Cabdirisaaq Uk
5 Cabdullaahi Suldaan
6 Cabdirashiid Taaraa
7 Cali Yare
8 Cabdullaahi Suudaani.
Dowladda Federaalka Soomaaliya ayaa si kulul u Cambaareysay qaraxaas Is-miidaaminta ahaa, waxaana Qoraal kasoo baxay Wasaaradda Warfaafinta lagu sheegay in Dowladda ay ka xuntay wixii dhacay, iyagoona tacsi u diray qoyska dadkii goobta ku naf-waayay.