Maamulka Gobolka Hiiraan ayaa si hordhac ah ugu guuleystay inay xaliyaan abaabul ka dhan ah dowlad Goboleedka Hirshabeelle oo maalmihii lasoo dhaafay ka socday duleedka Magaalada Baladweyne ee Xarunta Gobolkaas.
Guddoomiyaha Hiiraan Cali Jeyte Cismaan oo uu weliyo Taliyaha NISA ee Gobolka Hiiraan Colaad Cabdullaahi Dalabeey ayaa ku guuleystay inay xaliyaan Saraakiil hore oo ka tirsan dowladda Federaalka oo deegaanka Ceelgaal ka waday abaabul Ciidamo hubeysan oo maleeshiyaad ah.
Guddoomiye Cali Jeyte ayaa Ceelgaal kulan dhowr saacadood socday kula qaatay halkaas Saraakiisha Ciidanka oo la tilmaamay inay siweyn uga soo horjeedan dhismaha Cusub ee Maamulka Hirshabeelle , ayna wadeen qorshe ka dhan ah maamulka.
Warar la helayo ayaa sheegaya in Maamulka Gobolka uu Saraakiisha hore ee Ciidanka ee waday abaabulka Ciidamo Maleeshiyaad ah uu ku qanciyay in wax kasta oo tabasho ah ay qabaan lagu xalinayo si wada-hadal, isla markaana la kulmayan Madaxda maamulka.
Ugu dambeyn Maleeshiyaadkii lagu uruurinayay deegaanka Ceelgaal ee duleedka Magaalada Baladweyne ayaa la xusay in halkaas laga qaaday, waxaana haatan halkaas ku sugan Ciidamo ka tirsan kuwa dowladda Federaalka, si ay u sugaan amniga.
Madaxweynaha Hirshabeelle Cali Cabdullaahi Xuseen Guudlaawe iyo ku-xigeenkiisa Yuusuf Axmed Hagar Daba-gabeed ayaa sheegay inay xalin doonaan tabasho kasta oo ka dhalatay Doorashadii ka dhacay Magaalada Jowhar iyo dhismaha Maamulka Cusub.
