Duqii hore ee Muqdisho Taabit Cabdi maxamed ayaa Dowladda Federaalka Soomaaliya ugu baaqay in ay  dib isugu laabto oo ay saxaan qaladaadka dastuuriga ah ee Guddiga doorashada, muujiyaanna daah furnaan.
Waxaa uu sheegay in umadda Soomaaliyeed ay baahan tahay aragti qaran oo ku dhisan tanaasul iyo rajogelin.
Hoos ka Aqriso Qoraalka uu soo saaray Duqii hore ee Muqdisho
Dadka Soomaaliyeed waxa ay maanta heystaan muraayad yar oo aan meel siman saarneyn. Haddii qof damco in kaligii isku eego muraayadda yar ee malaayiinta ka dhaxeysa waa mid dhibkeeda leh, waxaase ka sii daran haddii la yiraahdo gacanta hala dhufto si looga dhigo.
Sidaa darteed, aayaha ummadda Soomaaliyeed ayaa ku xiran in hoggaanka dalka dib isugu laabto oo ay saxaan qaladaadka dastuuriga ah ee Guddiga doorashada, muujiyaanna daah furnaan.
Soomaaliya, dowlad iyo shacab-ba ma xamili karaan fadqalado iyo awood isku baacsasho balse, waxa ay u baahan tahay aragti qaran oo ku dhisan tanaasul iyo rajogelin ummadeed oo aan ku dabraneyn caqabaddaha maanta.
Ugu dambeyn, waa in laga fogaadaa adeegsiga awood, cunfi iyo colaad hurin, mar kastana hortabinta la siiyaa in dooddaha lagu maareeyo xeyndaabka dowladnimada.
